🐾 أشياء لازم تفكر فيها قبل ما تشتري قطة

قبل لا تتحمس لفكرة تربية قطة، خذ لحظة وفكّر: ترى هذي روح، والله بيسألك عنها يوم القيامة. القطة ما هي سلعة تشتريها وترجعها إذا ما ناسبتك. لازم تكون واعي إنك راح تكون مسؤول عنها وعن صحتها وراحتها طول فترة حياتها، واللي ممكن تمتد لـ 15 سنة أو أكثر.

ومن أول الخطوات المهمة، إنك تسأل المربي مباشرة هل القطة تشتكي من أي شي؟ هل فيها أي مشاكل صحية أو سلوكية؟ اسأله بوضوح، وخلّه يجاوبك وهو وذمته، لأن أي إهمال أو كتمان في هالموضوع ممكن يسبب لك وللقطة معاناة.

✳️ اطلب تصوير فيديو جديد للقطة، وشوفها كيف تتحرك، كيف شكل عيونها، هل فيها إفرازات أو علامات تعب؟ اسأل عن أسنانها، هل فيها تسوس أو كسر أو ريحة قوية؟ هل سبق وسوّت عملية جراحية؟ هل تعرضت لأي مرض سابقاً؟ واسأل عن شخصيتها: هل هي خجولة، اجتماعية، عدوانية، تحب الأطفال؟ كل هذي معلومات ضرورية قبل الشراء.

الآن نبدأ بأهم النقاط اللي لازم تفكر فيها قبل ما تدخل قطة في حياتك:

1. هل أسلوب حياتك يناسب وجود قطة؟

القطط صحيح إنها مستقلة نوعاً ما، لكن ما يعني إنها تعيش بدون اهتمام. ترى لازم توفر لها:

• أكل وماء بشكل يومي

• تنظيف مستمر للصندوق

• لعب وتفاعل عاطفي

• مراقبة مستمرة لصحتها

  
  ❓هل القطة تحتاج وقت يومي؟
  أكيد، تحتاج منك وقت مو قليل، مو بس عشان الأكل والنظافة، لكن حتى تحس بالأمان والاهتمام.
  إذا كنت كثير السفر أو دوامك طويل، يمكن تأجيل الفكرة أفضل لك ولها.

2. التكاليف المستمرة

كثير يعتقد إن كل التكاليف تنتهي عند شراء القطة، وهذا خطأ. التكاليف الحقيقية تبدأ بعد الشراء، ومنها:

• أكل يومي (حسب نوعيته)

• رمل وصندوق نظيف

• زيارات بيطرية دورية

• تطعيمات سنوية

• شامبو، فُرَش، قص أظافر

• ألعاب وتسلية

• أحياناً علاجات طارئة

  
  ❓كم تكلفة تربية القطة شهرياً؟
  على حسب، لكنها غالباً تتراوح بين 150 إلى 400 ريال، وقد تزيد إذا صار ظرف صحي مفاجئ.

3. هل في أحد بالبيت يعاني من الحساسية؟

بعض الناس يتحسسون من شعر القطط أو لعابها، وقد يكون وجودها بالبيت سبب ضيق يومي.

قبل ما تجيب القطة، تأكد من هالشي مع كل أفراد البيت، وخصوصاً الأطفال.

4. نوع القطة وشخصيتها

مو كل القطط مثل بعض. لازم تعرف هالشي زين، فيه قطط تحب الحركة، فيه اللي تميل للهدوء، وفيه اللي تحب الناس، والعكس.

❓هل السلالة تفرق؟
أكيد. بعض السلالات مثل "السكوتش فولد" هادئة جداً، وبعضها مثل "البنغالية" نشيطة وفضولية.
حتى كثافة الشعر، والتحسس، والحجم، كلها تختلف من سلالة لأخرى.
فلا تختار قطة بس لأنها "كيوت"، اختَر بناءً على نمط حياتك.

5. هل تشتري أو تتبنى؟

إذا تبي تبدأ بشكل إنساني، فكّر في التبني. فيه آلاف القطط اللي تنتظر بيت آمن.
لكن إذا قررت تشتري، لازم:

• تختار مربي موثوق

• تتأكد من الأوراق واللقاحات

• تطلب تقارير صحية إن أمكن
  🚫 لا تشتري من السوق أو البائعين المجهولين بدون أي إثباتات.

6. هل بيتك جاهز؟

لازم قبل لا تدخل القطة البيت يكون عندك:

• صندوق رمل

• أكل وماء

• سرير مريح أو بيت صغير

• خدوش وألعاب

• مكان آمن بعيد عن الأجهزة الخطيرة
  البيئة المريحة تساعدها تتأقلم بسرعة، وتخفف من التوتر.

7. هل أنت مستعد للالتزام؟

القطة ما تعيش أسبوع أو شهر، عمرها ممكن يوصل لـ 18 سنة، وبعضها يعيش أكثر.
❓وش أسوي لو اكتشفت إنها ما ناسبتني؟
هذا السبب اللي يخليني أكرر: لا تستعجل. خذ وقتك بالتفكير.

لكن لو صار ظرف قوي، لا تتركها أو ترميها في الشارع، حاول تلاقي لها بيت بديل آمن ويهتمون بها.وأكرر إياك ترميها في الشارع لأنها ماتعودت وممكن تموت .

💡 نصائح سريعة:

• استشر طبيب بيطري قبل الشراء.

• اقرأ عن سلوك القطط واحتياجاتها.

• لا تستعجل، وخل القرار نابع من قناعة تامة.

• خلك صادق مع نفسك، هل فعلاً مستعد لهالمسؤولية؟

✨ الزبدة من هالكلام:

ترى تربية قطة قرار كبير، ما هو نزوة مؤقتة.
خذ وقتك، اسأل، جهز، وراجع نفسك أكثر من مرة.
إذا كنت مستعد فعلاً، صدقني، القطة راح تضيف لحياتك حب ولطافة ما توصف.
وإذا ما كنت جاهز، مو عيب تقول "مو وقته"، العيب إنك تظلم روح بريئة ما لها ذنب.

أخيراً لو اشتريت قطة فمن الضروري تشوف هالموضوع هذا "نصائح بعد شراء قطتك الجديدة" 

 ولاتنسى تضيفني في مواقع التواصل الإجتماعي